Wednesday, November 07, 2007

إختلااااااااااااااف



"دوام الحال من المحال"

بطمن لما بسمع الجملة دى .. مش معقول يستمر الليل .. مش معقول تستمر الوحدة والقلق .. وحشتنى مدونتى وحشنى التدوين والكتابه والناس والتعليقات .. حاسس انى مختلف .. حاسس ان الشمس بتشرق على حياتى كلها .. نور مالى كل ذره من كيانى .. بفكر فأى شئ وكل شئ وانا مرتاح من غير قلق .. معدش فى جزء من عقلى مظلم بخاف ادخله .. ثورة فحياتى كلهااااا .. مكنتش متخيل انى ادون قريب بس حتى النور لازم يطول مدونتى العزيزة

من سنة

بسمع صوت فيروز بشجن .. كانت بتعذبنى .. كانت بتعزف على جروحى .. عشقت الكلمات وكرهتها فنفس الوقت .. بكل بساطه ف اخر ايام الصيفية كانت بتكرر وحدتها وانها منسية و أنا احس كل معنى لكل حرف بتقوله



أكيد كنت لوحدى
والسفر مكنتش راحمنى
اجهاد نفسى لدرجة انى بسأل امتى مش هكون مضايق
امتى مش هفكر وفى جزء فمخى مضلم
مش عارف ادخله قافل النور عشان مشفش اللى خانئنى وكان اكبر جزء ... حاجات كتير مفيش حد من اصحابى كان جمبى .. انتى نفسك مكنتيش موجوده
مش باصص لابعد من بكره
عايزه يمر من غير مشاكل ف البيت او مع حد
او انى ابقا لوحدى
ساعات كنت بتمنى ابقا لوحدى
ولما بكون لوحدى بكون مضايق بس ساعتها بيبقا احسن من انى موجود مع حد
اكيد بكره احسن
بحب الجملة دى اوى
صحيح بكره ساعات بيبقا بعيد
يمكن كمان شهر
سنة
او اكتر
بس بيبقا احسن
كنت معرفش غير مواعيد القطر فلك بلف فيه وادوووووووووخ مش شايف غير دايره مرسومالى
اغانى قديمه هدوم قديمة
افكاااار قديمة
ساعات كنت بدخن
وساعات كنت ببقا لوحدى
وساعات افكر فيكى واقنع نفسى انى فبالك
واقلك بحبك

وف السفر لو منمتش ابص ع الطريق
على مليوووووون شجره مضلله تحتها على شط ميه .. وافتكرك
واروووووح
نفس النظرات والكلام نفس الحلم والافكار تقريبا نفس الاكل حتى ..اقعد قدام النت احتمال كبير يطلع مفصول
واسمع فيروز ميييييييييت كرباج
نا ف البرد مغطى وشى مش عايز حد يحس بمشاعرى ولا عايز احس بحاجه لانى مكنتش هعرف احس اساسا واليوم يتكرر
بس انا كنت متأكد انك لو جمبى ساعتها كان الوضع اختلف
اكيييييييييييييييييييييييييييييييييييييييد
آدى حكاية اخر ايام الصيفيه اللى كانت بتستمر معايا لبداية الصيفيه الجديدة.. انما الوقتى اكيد انتى عارفه انى مرتاح .. مفيش سفر .. مفيييييييييييييش برد ولا وحدة .. حتى اخر ايام الصيفيه مش بحسها زى مكنت
فى اختلاف .. صدقينى دوام الحال من المحال .. بس يا ترى الحال بيتغير امتى؟؟؟ دا السؤال




الكلام مقتبس من حوار حقيقى Xxxx

25 شاركنى ثورتى:

خلود صلاح said...

مبسوطة انى اول من شاركك ثورتك
بس هى مين اللى لو كانت جمبك كان كل شئ هيبقى كويس؟؟؟
اصل الوحيدة اللى ترقى للمستوى دة من الحب هى والدتك
لكن لو اى حد تانى ... مش عارفة يبقى انت مندفع اوى فى حبك ليها .. واهدى شوية
ويارب كل ايامك تبقى مليانة فرحة وهداية
:)

FrEe.PhArAoH said...

خلود صلاح

منوره المدونه

لا مش والدتى اكيد مش بحب والدتى اقل من كدا بس مفيش اندفاع ف الحب ولا حاجه لو وصلنا لأننا نحب لازم نحب بدون قيود .. دا اللى ممكن يحقق الهدوووء

شكرا ع الزيارة والكلام بجد

خالص مودتى

dandana said...

اهلا بك...بلا برد ..او وحدة...

اهلا بك جديدا ..نقيا..معافى ..او ربما شبه معافى

رفقة عمر said...

اولا حمدا لله على سلامتك
واشكرك على زيارتك مدونتى
وبعدين ماشاء الله مع انك لسه صغير بس بجد افكارك كبيره قوى ومدونتك قويه جدا
بس مش عايزاك تحمل نفسك فوق طاقتها انت لسه صغير علشان تشيل الهم
ان شاء الله مستقبلك مشرق وجميل ويارب تحقق كل احلامك اللهم امين يارب العالمين

soma said...

أكيد دوام الحال من المحال ومفيش اى حالة حزن مهما كانت بتستمر للأبد

صلاح جاهين بيقولك

حاسب من الأحزان وحاسب لها
حاسب على رقابيك من حبلها
راح تنتهى ولابد راح تنتهى
مش أنتهت أحزان من قبلها؟
وعجبى

عايزة أسألك أنت عايز توصل ايه من الصورة أنا مش فهماها اوى معلش استحملنى

عاجبنى جدا أنك فى عز أزمتك قادر تكون متفائل وقادر تقول لنفسك أنك بكره أحلى مش سهل ان اى حد يقدر يعمل كدا على فكره

البوست عامتا الإحساس فيه عالى اوى اوى والكلام طالع من القلب بصدق وبساطه

وختاما ممكن أقول أنك حد حساس جدا وأبسط حاجه بتمسك فى قلبك وتهز أحساسك

يسلم قلمك وقلبك

فرنسا هانم said...

انا جيت وسع الطريق ياجدع فرنسا وصلت ومعاها اكله سمك سويسى معتبر
نفسى انقطع من السلم
ايه يا عم الثورجى انت ساكن فى العلالى قوى
فعلا انت احساسك عالى جدا
احييك على مدونتك الجميله

Anonymous said...

ممكن أستغل المساحه دى واعمل اعلان صغير
16 نوفمبريا جماعه..مستنياكو يوم الجمعه الجايه الساعه 8 م..قاعة الحمكمة بساقية الصاوى
هانتقابل ونحضر حفلة لفرقة أيامنا الحلوه..واحده من اكبر التجمعات البلوجرية المهمه
تعالوا وقولوا للحبايب

FrEe.PhArAoH said...

dandana

منوره .. ميرسى ع الترحيب الجميل دا بجد :)

تحياتى

رفقة عمر

يا عينىىى .. انتى بنفسك هنا .. انا معجب بمدونتك على فكره .. ميرسى على تعليقك
بس تفتكرى صغير :( ... ههههههههه

شكرا على الكلام والدعوة

منورة

خالض مودتى

FrEe.PhArAoH said...

soma

الصورة الاولى ولا التانيه ؟؟؟

وكمان على فكره كتير ببقا قاصد ان الصورة تتفهم حسب كل واحد ميكنش ليها معنى معين .. المعنى اللى يوصلك بيكون مختلف عن اللى وصلى مثلا .. طالما مضمون الكلام واحد وهنفهم منه حاجه واحده مثلا .. خلى الصوره تكون سفر جواكى انتى .. انتى فهمتى منها ايه ؟؟
ميرسى على رأيك فيا بجد .. ودا كتير عليا على فكره

مودتى

فرنسا هانم

فرنسا عندىىىىىى .. دخلتينى التاريخ بالاكله السويسى دى على فكره .. تحياتى لكل اهل السويس الجدعان اوى اوى اوى بما فيهم فرنسا هانم :) طبعا
ميرسى على تعليقك ورأيك

مودتى

وينكى

اوك .. وصل الاعلان


تحياتى للكل

Anonymous said...

لازم فعلا ثورة ع النفس

للازم مجاهدة

ربنا ينور قلبك يا صديقي

FrEe.PhArAoH said...

مصراوى

شكرا ع المرور

الثورة تطهير .. الثورة ع الظلم قمة العدل .. وجود تعليقك بيكمل الموضوع بجد

خالص مودتى

سهر الليالى said...

كلامك كلة لمسنى وكأنك بتوصف حالى دلوقتى اللى هو كان حالك من سنه

بهنيك جدا على ما وصلت إليه وربنا يديم عليك السعادة والاستقرار والحب

وبتمنى انى أنا كمان اوصل للى انت وصلتلو

فعلا " دوام الحال من المحال " بتريح جدا
شكرا لك
والحمد لله
تحياتى

Tamer Nabil Moussa said...

السلام عليكم

حمد الله على السلامة ياصاحبى ومرحبا بعودتك


ربنا يوفقك ويكرمك

تحياتى

نوري said...

كلامك جامد جدا
وحلو قوي
وفعلا دوام الحال من المحال
والبوست كان كله احاسيس
جميله ورقيقه قوي
واحلي حاجه انك كتبتهافي وقت حاجه لكده وطلعت جميله بمعناها واحساسك مش بزخرفتها وشكلها وتنسيقها
دعواتي ليك انك تكمل الحكايه ع خير
من غير اي خسائر
و(بست وشز فور يو)0

بياترتس said...

فرعون اخويا
اجمل ما فى كتباتك انك بتطول من غير ما أحس بملل وده شئ جميل جدا
دوام الحال من المحال ده حقيقى فعلا بس ده ميمنعش انك تفضل محتفظ بذكرى وبجرح عمره ما يتقفل
بس مينفعش معاه نقفل اى حاجه ولا نبعد عن ارتباطنا بالحاجات الصغيره اللى بنعملها زى البلوج مثلا
وجميل جدا النيولوك وشكرا لانك لسه محتفظ بالاغنيه

allfollowsome said...

ركز بقى فى النور وفى الشمس المشرقة وكمل كده

Anonymous said...

اكييييييييييييد انا متأخره
بس الفكره انى كل مره افتح البلوج علشان اكتب تعليق كلامك يشدنى
فاقراه من الاول و انسى ارد :)
مش عارفه المفروض اقول ايه
بس بجد انا اسعد مخلوقه فى الكون بكلامك ده
ربنا يخليك ليا
ايزيس

Anonymous said...

كل سنه و انت منور مدونتك و منور الكون كله
كل سنه و انت معايا و مع كل اللى بيحبوك
كل سنه و انت طيب و كل حبايبك بخير
كل سنه و انت طيب يا انا
ايزيس

FrEe.PhArAoH said...

سهر الليالى

فرحان ان كلامى لمسك واتمنى بجد تعدى اللى انتى فيه .. حاسس بأحساسك جداااا

منوره وربنا معاكى بجد

مودتى

Tamer Nabil

وعليكم السلام ورحمة الله وبركاته
الله يسلمك يا جمييل
تشريفك وتعليقك عندى كبييير اوى
منور .. تحياتى

نوري

شكرا يا نورى .. انتى ارق
شكرا ع الكلام بجد مش لاقى رد على كل دا
منوره المدونه
تحياتى

FrEe.PhArAoH said...

اختى بياترتس

انتى تعليقك بيسعدنى قبل اى رد
بس انا بحب اقفل الملفات .. مش اكيد لو فى جرح وسببه راح يمكن بحسس نفسى ان الجراح راح ومع الوقت هحس بكدا .. شكرا على رأيك ف الشكل الجديد .. والاغنيه عجبانى بردو مش عايز اغيرها :) .. كنت بفكر احط الشاطر عمرو بس متهيألى مش فمكانها
اكيد عشان مسميش عمرو :(

منورة

Taher

ربنا يديمها نعمة
ميرسى على مرورك
تحياتى

إيزيييييييييس واول تعليقاتها :)
كنت عايز كلامك يبقا من مدونتك بس خير .. هقنعك انا :)
بحبك يا مصرية

Anonymous said...

كل سنه وانتم طيبين
وحبيت أعزمكم على حفل افتتاح دار الكتب بتاعت صاحب البوابه , زميلنا البلوجرى الفظيع
ودا هايكون يوم الخميس 10 يناير الساعه 6 مساءا فى مكتبة البلد , 31 شارع محمد محمود بالتحرير
عاوزين تواجد مكثف هناك
مستنيينكواااااااااااا

يا مراكبي said...

بتغيب كتير على فكرة

Moslma-N said...

لماذا لا يوجد جديد؟
انا بعلق على التدوينة دى لان تدوينة عيد الميلاد مش عليها تعليقات
فى كلا الاحوال ننتظر الجديد و كل عام و انت بخير

holohozo said...

تمام

eltamaz elmithaly said...





شركة الماسة لمكافحة الحشرات بالدمام
شركة الماسة لمكافحة الحشرات بالخبر
شركة الماسة لمكافحة الحشرات بالقطيف
شركة الماسة لمكافحة الحشرات بالجبيل
شركة الماسة لمكافحة الحشرات بالظهران
شركة الماسة لمكافحة الحشرات ببقيق
شركة الماسة لمكافحة الحشرات براس تنورة
شركة الماسة لمكافحة الحشرات بسيهات
شركة الماسة لمكافحة الحشرات بصفوي
شركة الماسة لمكافحة الحشرات بالرياض




Twitter Delicious Facebook Digg Stumbleupon Favorites More

 
Design by قوالب بلوجر | Bloggerized by Lasantha - Premium Blogger Themes | Bluehost custom blogger templates