تاج الجزيرة

العودة الثالثة على التوازى

فى غمرة الحياة تضيع الكثير من العادات التى نحسبها المعبره عنا او حتى مهربنا الوحيد الذى نشعر من خلاله بذواتنا بدون رتوش او تجميلات لا تمت للحقيقه بصله .. من الممكن ان نعاشر اناس لايعرفونا عمرا بأكمله .. حتى العشره ليست بالضروره هى الموضوحة للشخصية .. لقد وارتنا الحضارة الزائفة والسلبيات خلف اقنعة محكمة على وجوهنا يصعب خلعها حتى منفردين فانتشر التصنع واختلط بالحقيقة وامتزجا .. حتى صار الزيف والحقيقة وجهان لعملة واحده عند المعظم .. فصار تصنعه حقيقه وحقيقته تصنع
التدوين الذى هو وجها من وجوه التعبير عن الذات كالتمثيل والرسم وغيره من الفنون صرت لا اعلم هل يمت لحقيقتى ام زيفى .. اهناك زيف حقا ام وساوس ام هى عدوى انتقلت الى الجميع ام هو ديدن البشر فى التكاسل و استحالة الاستمرار على المنوال نفسه لمدة كبيرة
انها الحياه ومشاغلها .. انها الدراسه التى لا تمت للدراسه الا باسمها .. انها العطله التى هى عطله بكل ما تعنى الكلمة من معانى .. عفوا اعزائى لقد انقطعت رغما عنى لكنى اشهد الله اننى احببتكم بتطلعاتكم ببرائتكم بعفويتكم وحتى باخطائكم .. و ها هى عودة اخرى .. كأى عودة .. وفى نهاية الحياة لكل منا عودة
وصلنى من العزيزة مسلمة التى تحولت الى مسلمة ن : تاج .. مشكورة هى على ما فعلت .. بالطبع رغبت ف العودة باختلاف و هى حققت لى ذلك .. مبرووووك على المدونة الجديدة يا مسلمة .. اعلم انها متأخره لكنها بالنسبة لى جديدة .. تصميمها رائع

-------------------------------------------

التـــــــــاج

س:ايه اللي حيحصل لإيميلك لما تموت ؟
هيموت زى صاحبة .. الايميل بتاعى هو المعبر عنى وملوش معنى غير لما انا افتحة لو حد تانى فتحه وراسل من عليه مش هيبقاله معنى .. مش هوصى ان حد يفتحه بعد مموت .

س:اديت الباسوورد لحد قبل كده ؟
واحد صاحبى لظروف والباسوورد اتغير

س:اسمك؟
محمود صفوت

س:مجال دراستك؟
الرسمى تجارة .. غير الرسمى التاريخ ومقارنة الاديان وفروع الادب والفن

س:شخصيتك نوعها ايه؟
من النوع الحلو دا المقرمش من بره والطرى من جوه :)
عن نفسى اعرف انى عصبى جدا وسهل الاستثاره .. عنيد وبحب الاعتماد على نفسى .. ممكن اكون فى احيان كتير قاسى ف التعامل لكن دا مش طبعى .. مش بسمع غير صوت عقلى بعد متاكد انى صح لو انا حاسس انى صح مستحيل تغير فكرتى .. ممكن تقنعنى بأدله او سبنى انا اقنعك .. مكنتش رومانسى قبل معرفها الوقتى بحس بالكلام والالوان وصوت منير .. اظن انى بقيت رومانسى او ع الاقل مش سوداوى .. متفائل ف احلك الظروف .. احيانا كسول .. باحث عن العدل والسلام مع نفسى اولا ثم مع الاخرين .. لا اعرفنى : ف المعظم اجهل ردود افعالى واندهش بها مثلما يفعل غيرى .. عاااااااااااااشق للحرية واشعر كثيرا بالوحدة

س:بتعمل ايه في وقت فراغك؟
اكيد القراءة الاهم غالبا .. بعشق المسرح لو مسرحية او بروفات يبقا تمام .. بكتب .. بخرج من البيت .. بهتم بالكمبيوتر والنت .. مش بحب التليفزيون اوى لكن اكيد هو اهم وسيلة اعلامية

س:الأكلة المفضلة؟
ياعينى .. هى دى الاسئلة :)
بمووووووت ف المكرونه بكل انواعها والفراخ المحمره او الكفته .. يا سلام بقا لو رقاق او محشى يبقا بجد اتعمل معايا واجب :)

س:الصفات اللي اخدتها من بابا؟
انا والدى حارب ف73 .. والدى راجل مشفتش زيه .. من حقى افخر بيه .. هو عصبى وعنيد وغالبا كتوم مش بتعرف اهدافه .. مش مسرف .. حكيم .. شيك وذوق جدا فاختيار ملابسه راجل جدا لو صح التعبير .. انت معاه فأمان .. يحتويك
اظن انى اخدت الصفات دى منه بس مظنش انى هكون زيه .. بالنسبالى مثال

س:الصفات اللي خدتها من ماما؟
عدم التنازل عن الحقوق .. الحب البريئ للوطن العربى كله وكل فرد فيه .. الحساسية المفرطه لكن بطبعى محدش بيحسها فيا لانى بقدر اخبيها .. مخدتش منها اكتر من كدا لأنى لو خدت اكتر من كدا كنت اتحولت لسوزى

س:اكتر 6 حاجات بتكرها؟
الخيانة
الظلم
الغباء
القيود
التفاهه
الغرور

س:اكتر 6 حاجات بحبها؟
العدل
الابداع والتجديد
الحرية
الاعتماد ع النفس
الصداقة
الامل

س:الشغل بالنسبة لك ؟
التحرر من القيود .. تحقيق الذات والبداية لتكوين رأى منفصل عن جو الاسرة .. مهم كنقطه بداية للحياه ذاتها

س:ماذا تعنى الدنيا بالنسبة لك؟
الدنيا هى سارقة محترفة .. احترس من ان تسرق عمرك او مالك او عقلك

س:"القرآن" ماذا يعنى لك؟
هو كلام الله المتعبد بتلاوته .. له ثقل نفسى يفوق كل التعبيرات .. فهو المقنع والمهدئ والمبارك .. نشعر به ونفهمه غير ان شعورنا لا يمكن وصفه وكلامنا عنه لا يساوى احساسنا به

س:"الله" ماذا يمر بذهنك اول ما تقرأ هذه الكلمة؟
الكفر والايمان

س:ما هى مواصفات شريك الحياة و البيت السعيد فى نقاط ملخصة؟
ان قلت مواصفات سأصفها هى .. فعنها لايمكن وصفها الا بالحنان والعذوبة
جمعت بين العقل والرقه .. جمعت بين الجمال والاخلاق .. هى ايزيس الوفية .. رقيقه كزهرة متفتحة .. هادئه كالنيل .. مشتعلة كالنجوم .. تعاهدنا على ابدية حبنا واتفقنا ان ما بيننا ليس بحب وانما ذوبان الذات ف الذات .. هى لايمكن وصفها .. لكنها فتاتى

س: من هم قدواتك فى الحياة_ من واحد الى خمسة؟
قدوتى بعده صلى الله عليه وسلم
قلعة العدل ابن الخطاب
والدى
محمد انور السادات .. حيث العقل والرقى .. والوعى والاحاطه .. له ماله من الاخطاء لكنى احبه
رجل امسك بقلم او مكبر صوت واذاع على الناس حقوقهم

س:ما هى اهتماماتك و مواهبك ؟
اعتقد انها القراءة والتمثيل والكتابة

س: ما هى امنياتك _ مع ذكر امنيات تحققت و امنيات لم تتحقق بعد؟
امنياتى هى امتلاك صرح ثقافى كبير يهتم بكل فروع الثقافه على مستوى عالمى
امتلاك بيت يضم كل من احببت

الوصول للحكمة .. ان يسمع رأيى لا لأنى صاحب سلطه وانما لأنه الاصوب
العيش فى رضا .. حب الناس
الموت ساجد

س:ما هى اهم قضاياك؟
هى قضية واحده تتغير بتغير المكان والزمان والاشخاص
احقاق الحق و نشرة و ازالة الزيف

شكرا يا مسلمة .. انا مش همرر التاج لأنه عند المعظم بالفعل

Posted in: تاج