Tuesday, July 16, 2013

النوايا .. مش بتسند حاجة :(

عن النية الطيبة نتحدث

المشكلة الاساسية اللى ممكن تواجهك مع اى حد بتحترمه ... نيته الطيبة !
تحت مسمى النية الطيبة .. ممكن يتطفل عليك (بيطمن) .. ممكن يعلى صوته (متحمس او بيسمعك كويس) .. ممكن يحرمك من متعة معينة (خايف عليك) .. ممكن يقتلك او يقتل جواك حاجة (غبى اكيد !) ..

تحت مسمى النية الطيبة بتشوف جرايم بشعة فمختلف العصور .. اعدام العلماء فعصور الظلام .. حرق الفتيات لأنهم : ساحرات .. اضطهاد دينى : لتحجيم الكفر والهرطقة .. حتى الحروب الصليبية دعوتها الاساسية كانت قايمة على نية طيبة : موجهة



رغم كل المحاولات : اللى بتحاول تخلى فيها تصرفك الشخصى على مستوى نيتك الطيبة بيلعب مفهومك عن التنفيذ الدور الاكبر .. مفهومك عن تحقيق نيتك الطيبة .. لما مجموعة من النوايا الطيبة تتجمع .. لتشجيع فريق الاهلى كمثال بغرض المتعه : الحماس بيكبر .. التعصب بيظهر .. بتعادى الزملكاوى اللى زيى :).. عشان انت وطنى وبتعشق الخطيب وابو تريكة .. واللى زيى فماتش الاهلى = الاعور موشى ديان >> حقيقة للأسف

و المصرى اللى عاش ثورة يناير .. نيته طيبة .. ضد القهر والعهر والجهل .. ببساطة : ضد مبارك .. 
المصرى دا نزل ف30/6 عشان نيته طيبة .. والمصرى اللى اتضرب عند الحرس الجمهورى .. نيته طيبة

استخلاص الحق المطلق فعلبة صغيرة فجيبك حاجة مستحيلة .. اتهامك لميدان التحرير بالتخلف : تخلف .. واتهامك لرابعة بالخرفان : تخلف .. مش محاولة للحيادية لكن انا مشكلتى : انى بحاول اشوف هل النية طيبة ؟؟؟؟؟
اشاعااااات .. العاهرات تملأ ميدان التحرير .. والجرب يجتاح رابعة العدوية .. انت مصدق ؟؟ .. مشكلة انك تصدق اشاعة وتكون نيتك طيبة .. هتتحمس وتكره الاخر وهيساوى عندك : القهر والعهر والجهل .. او مبارك زى متفقنا :D

المفهوم الاوضح بعد كل الفتن والاشاعات الناتجة عن توجيه النوايا الطيبة : احنا فمشكلة تخوين جمااااعى .. وكل واحد بيحب البلد بطريقته .. انتى مش عاهرة وانت مش خروف .. انت مصرى محترم : نيتك طيبة

على فكرة انا مش خروف ولا موشى ديان ..
انا شايف ان اللى حصل بدون تفاصيل : انقلاب على ثورتى فيناير .. وفعلا نيتى طيبة  !

13 شاركنى ثورتى:

sara sawan said...

النيه شئ ظريف و لطيف و احتمال كبير يودى ف داهيه :D
زمان كان فى جرايم بتحصل بسبب تهم زى الهرطقه الشعوذة و السحر زى مانتا قولت
جرايم عصرنا دا مشابهه .. لا إنسانيه .. لا منطقيه .. و الاهم من كل دا ان كل فصيل اصبح بيضطهد التانى
احنا شعب ع نياتنا اوى :D !!

Mahmoud Safwat said...

@sara
الموضوع فعلا موضوع تخوين بعض الناس المحترمة لبعض الناس المحترمة .. مننكرش ان فى ناس فعلاااا عايزه تعتم وتوريكى واقع مغاير بنية سيئة .. بس ع الاقل دول اكترهم معروفين .. المؤلم فعلا انك تتهمى حد : نيته طيبة

منوره :)

Mohamed Samara said...

مقال جميل اوووووووووووووي يا كومي ...استمر

Mahmoud Safwat said...

@Mohamed Samara

تسلم .. جميل عشان عجبك على فكرة :)

كل سنة وانت طيب

Anonymous said...

المشكله لو احنا فسرنا كل حاجة ع انها نيه طيبة وهي عكس كده .. المصيبه لما اعاملك أنا بطيب نيه وترد انت بالعكس .. المصيبه لو أنا عشان بتعامل بنيه طيبه اعتبر الكل بيعاملني زي ما بعامله ... بغض النظر خروف وﻻ موشي ديان يعني ...وبالنسبة للنقطة دي هو انت عارف اﻻيام دي الصح فين والغلط فين ؟ محدش عارف وﻻ حدش فاهم أنا من زمان قولتها أنا حزب كنبة لما اعرف فين الطريق الصح اللي اعرف امشي فيه ومندمش ف يوم ان مشيته
تحياتي عجبني كلامك ... همضيلك باسم @عابرة سبيل :)))

Mahmoud Safwat said...

@عابرة سبيل
منورة اكيد .. اتمنى دايما كلامى يعجبك
اعتقد اه انى عارف الصح فين والغلط فين ( من وجة نظرى) بمعنى ان يجوز الصح فرأيى مش هو الصح المطلق لكن فمعتقدى الشخصى هو الصح فعلا .. و بالنسبالى اكيد مستقر فين الصح وفين الغلط

بالنسبة لموضوع النوايا صدقينى ممكن بالخبرة تقدرى تحكمى بنسبة كبيرة عليه وبالتالى تحددى من صاحب النية الطيبة اللى يستحق نعامله على الاساس دا

خالص احترامى
همضيلك باسم @حسن الهلالى :D

Anonymous said...

@حسن الهلالي
ده نورك شكرا ربنا يخليك ... طيب بما انك عارف الصح من الغلط ما تنورني عشان أنا تايهه فعلا ومش عاجبني التوهان ده وانا مرزوعة في البلد دي يعني كل اللي بيحضل شيفاه وعرفاه لكن لو كنت مسافرة صدقني مكانش هيفرق معايا التوهان كنت هلاقي لنفسي عذر
قولي رأيك في اللي بيحصل .. سمعت اكيد خطاب السيسي رأيك فيه ايه معاه وﻻ ضده وهل هو محتاج تفويض فعلا !!
تحياتي @عابرة سبيل

Mahmoud Safwat said...

@عابرة سبيل

مبدئيا اللى حصل مش ثورة مظاهرات معارضة يقابلها مظاهرات مؤيدة .. مبادرة مقدمة لرئيس الجمهورية هو وافق عليها ورغم كدا السيسى خد قرار بتعطيل الدستور وتعيين رئيس المحكمة الدستورية
http://www.youtube.com/watch?v=lebAt44zbyA&feature=youtu.be

الفيديو دا هيوضحلك كلامى

طيب الدستور اللى احنا وافقنا عليه اتعطل .. عشان احمد فهمى ميمسكش الحكم وكذلك حل المجلس الشرعى الوحيد فى البلد المنتخب .. وبعد الانقلاب غلق قنوات واعتقالات وتجميد ارصده وتلفيق تهم .. ايه تهمة مرسى دلوقتى ؟؟ التخابر مع حماس .. مبدئيا دا رئيس الجمهورية يا جاهل وعنده معلومات وهو مفوض يتعامل مع الجهات الخارحية يعنى يقول معلومات او ميقولش دا موضوع ادارة .. ولاحظى ان التخابر غير العمالة .. التخابر دا غباء منهم .. وفنفس الوقت بيقولوا انه عميل مع امريكا .. هل امريكا وحماس (بتاعة الشيخ ياسين) متفقين .. لا دا دليل على سوء تدبيرهم
طيب دا انقلاب واستهبال وتعتيم اعلامى واشاعات .. ايه الحل ؟؟ الحل ان الانقلابيين عشان الانقلاب دا يستقر يصفوا اللى ضد الانقلاب سياسيا ومهنيا وجسديا حتى ..

بالنسبة للتفويض طبعا باطل .. مبدئيا هو ميطلبش رئيسنا (الطرطور) يقول يا جماعة انا هحميكم .ويأمر الشرطه بدا والشرطة تستعين بالجيش بعد كدا .. انما تجاوزه لكل الحدود دى والتعامل مع الشعب نفسه دا معناه انه بيقود المرحلة .. يعنى اثبات اكتر للأنقلاب العسكرى وان الرئيس المدنى مجرد طرطور
طبعا كلمة ارهاب كلمة مطاطة امريكا بعد 2001 علمتنا نستخدمها ازاى .. هيدخل تحتها كل معارضة حكم البيادة .. كلنا ارهابيين .. والتنكيل هيبقا بمباركة الجهلة اللى مش فاهمين يعنى ايه طلب تفويض شعبى من وزير دفاع فدولة المفروض مدنية .. بالنسبة لمرسى وللأخوان سوء ادارتهم وصلتنا لكدا بس هم مش مصاصين دم زى الاعلام المتخلف مبيصور
انا بهزر .. مش انا حسن الهلالى :D
انا @ابو زيد الهلالى
احترامى

Anonymous said...

والله يا بو زيد يا هلالي ربنا يستر ويعديها ع خير يارب ونطلع من اﻻزمة دي بالسلامة
متعتبرنيش بقصر في الكلام بس أنا بصراحة مليت من اﻻحداث
تحياتي
@عابرة سبيل

Mahmoud Safwat said...

@عابرة سبيل

كلنا ملينا .. والمواطن العادى هدفه سياسة اقتصادية محترمة يعيش كويس خلالها .. واحترامه فكريا ودينيا .. واكيييد محدش يقدر يظلمه فظل قوانين عادلة ..

كلنا نتمنى دا يتحقق .. انا مش بطول بس بما انك عابرة سبيل :تعاشبشاى ولا قهوة طاه :)
منورة .. احترامى

Anonymous said...

مينفعش نخليها عيش وملح وتسحرني ؟ :D
هقولك تاني ربنا يخليك ده نورك :)
تحياتي

Anonymous said...

كلامك صح اكيد .. بس معتقدش اننا هنبطل نعمل ده
احترمت وجهه نظرك المختلفه
و احترمت احترامك للكمات :)
من نجاح لنجاح

@نجمه

Mahmoud Safwat said...

@نجمة

ممكن نبطل.. محتاجين وقت مش اكتر

وانا احترمت تعليقك

خالص احترامى

Twitter Delicious Facebook Digg Stumbleupon Favorites More

 
Design by قوالب بلوجر | Bloggerized by Lasantha - Premium Blogger Themes | Bluehost custom blogger templates